Ma mage nèt bizzan djüst bazzez iz gest vor Lusèrn di auzbånderung ombromm ’z menglnda kartn boda khön bia, benn un ombromm di laüt vo Lusérn håm gemocht lazzan soi lånt un gian vort bait zo süacha arbat.
Daz mearaste di lusérnar soin gånt vort z’arbata lai übar in summar, lai in biane soin gestånt vort daz gåntz djar. Di lusérnar håm gemacht di maurar odar di hakharkhnottn.
Di auzlendar vo Lusérn, schiar lai allz månnen, håm gevuntet daz mearaste arbat un herbege in Tirol, in Österraich, in Bavìara, in Sachsen, ma da håm gearbatet in Fråntscha un in di Svaitz o, übarhaup in di djar boda soin gånt zbisnen in 1929 un 1939. Di groazan arbatn zo macha beng un aisapån in Euròpa håm zuargerüaft di månnen boda asó håm zornìrt di sèlln lentar zo machanen a lem.
Di arbatar soin khent gesüacht un inngestèllt durch zboa beng, odar durch in an åmt boda hatt gemacht bizzan allz bazta da iz gest zo bizza afte arbat boma hatt gesüacht odar durch åndre laüt boda sa soin gest in auzlånt un håm zuargerüaft di paesé, asó soinse gemacht naüge khnöpf laüt bodase soin untarmischt gerècht pinn laüt vo sèmm.