‘Z soinz sinamai draiunsèchtzekh djar azta Tria khinnt z’ soina da bichtegarste statt von Alpn, ombrómm in dise tang haltetze dar gekhennarste festival von tschinema von pèrng vodar gåntzan bèlt, boda hüar hatt offegetånt da vorgånnate boch, atz 30 von aprile. Di gröazarstn redjistn vo film übar di pèrng håm geprenk da soi arbartn in di 63 djar festival.

Ma nètt lai ber ‘z hatta zo tüana pinn tschinema iz ka Tria in dise tang; di gröazarstn pèrkstaigar o soinse hèrta gevuntet un gian vür zo vennase alle djar in di haupstatt vodar ünsarn Provintz. Reinhold Messner, Mauro Corona, Licia Colò soin lai a par vo dise laüt boma hat gemakk bokhennen ummar pa dar statt. Nètt lai redjistn, pèrkstaigar un krablar dunkue ma gåntz gekhennate laüt boda in an modo odar in an åndar håm zo tüana pinn geleba afte pèrng. Darzuar allz ditza, drinn in film festival izta a setziong gehoazt Montagna Libri un asó in Platz Fiara alle djar khinta hergerichtet a groazar tendù pitt alln in libadar boda ren vo pèrng gedrukht in di lestn djar, un pinn libadar ber ‘z hattze geschribet o.

Ma balda in di statt redetma vo pèrng vor a lånt azpe daz ünsar iz hèrta eppaz bichte. Haür darzua barta soin a tage boma bart reng von mindarhaitn von ünsar redjóng un von Alpm, von soin schraibar, un bazzez bill munen lem afti konfìn. Vor Lusérn, von soi pèrge, von soi mindarhaitn hattma sa ågeheft zo reda in vorgånnate såntzta balda dar Andrea Nicolussi Golo, dar schraibar vo Lusérn, iz khent gerüaft zo zoaga vor da earst bòtta in naüge romånzo von schraibar – tschéll von lusérnar – Antonio Bortoluzzi, Paesi Alti, a libar boda kontàrt a lem boda atz Lusérn iz gekhennt gerècht: ‘z lem von auzlendar un von baibar un von khindar boda soin gestånt in lånt zo traga vür alle di arbatn alumma.

Ma hatt nètt lai geredet von libar un vodar sèll zait ma o bia ‘z iz lem afti pèrng in tà vo haüt. Atz 10 von madjò, di sibane abas, in tendù von filmfestival bartnse vennen gekhennate schraibar boda håm geschribet von mindarhaitn azpe Arno Camenisch, Leo Toller, Sepp Mall, Francesca Melandri, Fabio Chiocchetti un vor Lusérn dar Andrea Golo, zo reda von zungen von Konfìn. Vor berda bill spetar in schümma Palazzo Roccabruna mage tschòinen pittnåndar pinn schraibar boda bartn kontàrn anìaglaz eppaz von soin lånt un vo soinar zung.

Andrea Zotti

Vita Trentina, mercoledì 6 maggio 2015